Þann 2. júlí 2000 stóð ég í 134. skipti á tindinum. Upp og niður Hnappaleið. Veður var gott, reyndar gola á öskjunni, en stafalogn uppi á toppi Hvannadalshnúks. Skyggni gott á Heklu og Snæfell, en lágský á láglendi suðausturlands. Við gengum á snjóþrúgum, sem kom sér vel því að niðurleiðin var mjög þungfær og við gátum gengið niður á þrúgunum.
Jökullinn var óvenju góður í neðri hluta, frá bíl í 800 m upp í ca 1700 metra, en í 1800 metrum og ofar var mikið sprungið. Hnúkurinn er að verða verulega illskeyttur, leit út fyrir að hefðbundin leið sunnan í móti væri orðin illfær, svo við fórum upp norðan megin. Þar var allt í lagi, en það verður ekki lengi.

    Þann 5. júlí 2000 stóð ég í 135. skipti á tindinum ásamt 3 Dönum. Upp og niður Hnappaleið. Veður var ágætt, á uppleið, en lentum í skýjum og rigningu á bakaleið. Lítið skyggni á toppnum nema beint upp í bláan himinn. Við lögðum af stað kl 9 að morgni og komum heim kl 11 að kvöldi. Fórum á gönguskíðum.
Ég mokaði talsverðum snjó í verstu sprunguna á norðanverðum Hvannadalshnúk. Vona að það fari að snjóa aftur svo að sprungur versni ekki enn frekar.

    Þann 14. júlí 2000 stóð ég í 136. skipti á tindinum ásamt 5 sprækum Labbakútum, og 6 Skandinövum. Færi var hið besta, við vorum u.þ.b. 12 tíma í göngunni. Sprungur í Hvannadalshnúk voru óárennilegar, en enn gat ég mokað snjóbrýr yfir verstu götin. Ég varð undrandi þegar ég kom að efstu brún á Hvannadalshnúk norðanverðum þar sem slæm sprunga hafði verið í fyrri viku. Hún var nánast lokuð og greiðfær. Ég fékk skýringuna þegar ég kom upp fyrir hana; öll hlíðin hafði sprungið frá á 150 metra kafla og ný gjörsamlega botnlaus sprunga myndast þar fyrir ofan. Við gátum sem betur fer krækt vestur fyrir hana. Þetta er í fyrsta sinn sem ég verð var við að sprunga myndist svo skyndilega. Maður fer að velta fyrir sér að gamlar báliljur um að jökullinn geti skyndilega opnast og gleypt mann hafi kannski við rök að styðjast.

    Þann 25. júlí 2000 stóð ég í 137. skipti á tindinum. Ég var að kanna nýjar leiðir þar sem uppgangan á norðanverðum Hvannadalshnúk er orðin ófær vegna sprungna. Ég komst að því að hefðbundin uppganga á suðurhlið Hnúksins er orðin afar slæm, þó ég hafi komist upp, en vestasta leiðin sem er í bröttum hliðarhalla er enn fær. Nú er bara að vona að það farið að snjóa sem fyrst.

    Þann 30. júlí 2000 stóð ég í 138. skipti á toppi Hvannadalshnúks, ásamt 5 Bergsveinum, einum Hirti og tveimur Svíum. Veður var afskaplega gott, bjart um allt himinhvolfið, en því miður kúfur á toppnum meðan við vorum þar. Niðri í sveit var lágskýjað og síðan súld, en við vorum í glaðasól fyrir ofan 1000 metrana. Við fórum upp vestustu leiðina á Hnúkinn, í bröttum hliðarhalla sem reyndist skárri núna en oft áður. Reyndar datt einn Bergsveinn í brattasta kaflanum, en með snarræði tókst honum að stöðva fallið með ísaxabremsu.

    Þann 6. ágúst 2000 stóð ég í 139. skipti á toppi Hvannadalshnúks, ásamt Möttu verðandi eiginkonu minni, þýsku pari og einum Halldóri. Veður var skýrt og fallegt, en dálítið frost. Aðstæður á Hvannadalshnúk voru betri en síðast, þó við þyrftum að brölta yfir nokkrar sprungur. Aðeins einu sinni datt einhver í sprungu, og þá bara með annan fótinn.
Við vorum 11 og hálfan tíma í göngunni, öll á snjóþrúgum. Ég gat í fyrsta sinn í sumar ekið upp á efsta bílastæðið á Sléttubjörgum í 910m hæð.

    Þann 15. ágúst 2000 stóð ég í 140. skipti á toppi Hvannadalshnúks ásamt 11 hraustum göngugörpum frá Finnlandi, Austurríki, Bretlandi, Frakklandi og Íslandi. Aðstæður voru orðnar betri en verið hefur í sumar, nýr snjór hafði kíttast í sumar af verstu sprungunum, svo að þær voru enginn farartálmi lengur. Jökullinn var mjög fallegur með hreinu lagi af nýsnævi. Veðrið var það besta í sumar.

ÖRÆFAFERÐIR ehf    Kt.521203-3310
Phone: +354 8940894    Email: info@hofsnes.com    Mail: Hofsnes, 785 Oraefi, Iceland

 Last edited 04.11.2008